Vendet e NATO-s që kufizohen me Rusinë po shtrëngojnë masat e sigurisë rreth digave, termocentraleve dhe infrastrukturës së gazit natyror, në një shenjë shqetësimi në rritje se Moska mund të organizojë një sulm ndaj tyre duke përdorur dronë ukrainas. Lituania tha javën e kaluar se Moska po shqyrton një sulm të tillë të organizuar dhe Polonia, Letonia dhe Estonia kanë paralajmëruar gjithashtu për akte sabotimi për të testuar reagimin e NATO-s në një kohë kur angazhimi i SHBA-së ndaj aleancës ushtarake perëndimore është në pikëpyetje. Zëdhënësi i Kremlinit, Dmitry Peskov, muajin e kaluar tha se paralajmërimet për sulme të tilla ruse është thjeshtë një "histeri masive" që përdoret për të justifikuar militarizimin kundër Rusisë. Polonia dhe tre shtetet baltike, të cilat kufizohen të gjitha me Rusinë dhe kanë gjetur tashmë dronë ukrainas në territorin e tyre, nuk duan të rrezikojnë. "Ne nuk jemi naivë, ne shohim informacionin, lexojmë mes rreshtave dhe po bëjmë detyrat e shtëpisë", tha Ministri i Mbrojtjes i Lituanisë, Robertas Kaunas. Ai, kryeministri i Letonisë dhe zyrtarë nga i gjithë rajoni ndanë detaje të reja të vlerësimeve të inteligjencës dhe përshkruan masat që po merren për të mbrojtur infrastrukturën kritike. "Ne po rrisim sigurinë e infrastrukturës sonë kritike, ne vazhdimisht shkëmbejmë informacion me inteligjencën tonë se çfarë të bëjmë më pas", tha Kaunas.