Policia në Australi arrestoi me qindra protestues në Melbourne dhe Sidney pas protestave kundër mbylljes për shkak të Covid-19, ndërkohë që vendi pati numrin më të lartë të rasteve pozitive në një ditë. Vetëm në 24 orët e fundit në Australi u regjistruan 894 raste me variantin Delta. Policia njoftoi se u arrestuan 218 persona në Melbourne dhe 47 në Sidney, për thyerje të rregullave të pandemisë dhe rezistencë ndaj forcave të rendit. Gjatë protestave të ditës së shtunë mbetën të plagosur edhe 7 oficerë policie. Sidney, qyteti më i madh i Australisë me më shumë se 5 milionë banorë, ndodhet në karantinë që prej dy muajsh. “Tani jemi në një situatë shumë serioze. Nuk kemi kohë që të tregohemi egoistë. Tani duhet të mendojmë për komunitetin dhe familjet tona. Nëse ju jeni duke shpërndarë virusin, ju mund të jeni përgjegjës për vdekjen e njerëzve.” deklaroi Brad Hazzard, Ministër i Shëndetësisë. Që prej fillimit të pandemisë, Australia ka pasur 43 mijë raste me Covid-19 dhe 978 vdekje. Pavarësisht numrave të ulët, deri më tani në Australi është vaksinuar vetëm 1/3 e popullsisë nga mosha 16 e lart. Pamjet: AFP