Një ndërtesë me 20 kate u përfshi nga flakët të dielën në Milano, dhe ajo që kishte mbetur mëngjesin e të hënës, ishte vetëm skeleti. Blloku me apartamente ishte ndërtuar para 10 vitesh dhe kryebashkiaku i Milanos, Beppe Sala, tha se ishte e papranueshme që një ndërtesë e tillë moderne, të rezultojë krejtësisht vulnerabël. Fatmirësisht, të gjithë banorët ishin evakuuar në siguri të plotë. Zyrtarët thanë të hënën që zjarri që shkatërroi gradacelën, kishte nisur në katin e 15, ndoshta për shkak të një qarku të shkurtër. Por më pas, kishte ndodhur ai që njihet si efekti oxhak, duke e kthyer ndërtesën në një pishtar gjigand. Nën kritika është vënë sistemi anti zjarr, që duket se nuk ka funksionuar mbi katin e pestë. Shkallët ndërkohë i kanë bërë të mundur personave që po largoheshin nga pallati të shpëtonin falë një mekanizmi që eviton shpërndarjen e tymit atje. Një video e filmuar nga një banor i zonës dhe që tani po analizohet nga prokurorët, tregon se zjarri ka shpërthyer në katin e 15 dhe në më pak se 15 minuta ka përfshirë të gjithë ndërtesën duke u shpërndarë mbi të gjitha në strukturën e jashtme, me të cilën ishte veshur ndërtesa, të përbërë nga fibra polistireni dhe alumini.