Top News – Qëllimet djallëzore të Serbisë… /’Krijon krizë që të mos flitet për marrëveshje finale’

Presidentja e Kosovës, Vjosa Osmani, tha të mërkurën se Serbia ka krijuar krizë në javët e fundit, në mënyrë që të mos diskutohet marrëveshja finale mes Kosovës dhe Serbisë. Ajo i bëri këto deklarata në një konferencë të përbashkët për shtyp me presidentin bullgar, Ruman Radev në Sofje. “Është koha që ndërmjetësuesit e dialogut, ta kuptojnë se Serbia ka përdorur taktikën e pengimit, përmes pjesëmarrjes”. Sipas Osmanit, pala serbe diskuton në tavolinë me kushte dhe pengesa. “Kjo është mënyra se si ata tentojnë të bllokojnë perspektivën e Kosovës në rajon dhe në nivel ndërkombëtar. Natyrisht, është në interesin tonë që ta përmbyllim këtë dialog me një marrëveshje ligjërisht të zbatueshme dhe duhet ta kuptojmë se pala që është në anën tjetër të tavolinës, nuk është e interesuar që ta përmbyllë këtë proces me sukses”. Presidentja e Kosovës tha se Serbia ka nisur të prodhojë kriza muaj më parë, kur, sipas saj, Bashkimi Evropian, i mbështetur nga Shtetet e Bashkuara, Franca dhe Gjermania, kanë dalë me një propozim për zgjidhjen e mosmarrëveshjeve mes dy vendeve. Propozimi që përmendi ajo - i njohur në publik si plani franko-gjerman - thuhet se parashikon disa hapa që do të çonin në zgjidhjen e problemeve mes Prishtinës dhe Beogradit.