Rusia ka sulmuar në mënyrë të pamëshirshme termocentralet dhe ka shënjestruar blloqe banimi në Kiev, vetëm pak ditë pas "armëpushimit energjetik" të propozuar nga Donald Trumpi. Të paktën gjashtë persona humbën jetën dhe mbi 600,000 ukrainas mbetën pa energji elektrike pasi Rusia lëshoi 39 raketa balistike dhe 120 dronë, deklaroi Volodymyr Zelensky. Putini lëshoi gjithashtu një numër rekord raketash hipersonike "Zircon", rreth 25, disa prej të cilave goditën blloqe banimi dhe shtëpi. Breshëria shkatërruese gjatë natës vuri në shënjestër Kievin dhe Harkivin; të gjashtë viktimat u gjetën të vdekura nën rrënoja në zona të ndryshme të vendit. 22 persona të tjerë, përfshirë një fëmijë tetëvjeçar, mbetën të plagosur ndërsa kryeqyteti ukrainas u zhyt në errësirë pas sulmeve brutale. Raketat e para goditën Kievin rreth orës 22:40, duke vënë në shënjestër një nga objektet kryesore energjetike, sipas Zelenskit. Tre termocentrale të tjera u goditën në kryeqytet, si dhe dy të tjera në Harkiv. Ndërprerje totale të energjisë u regjistruan në distriktet Darnytskyi, Dniprovskyi, Pecherskyi, Solomianskyi dhe Holosiivskyi, duke prekur gjithsej mbi 600,000 banorë. Një ndërtesë banimi nëntëkatëshe në Kiev u godit rreth orës 01:30, duke shkaktuar një zjarr që u përhap në apartamentet e tetë kateve të para. Civilët, me pizhama dhe rroba shtëpie, u detyruan të qëndronin jashtë në të ftohtin e acartë, duke parë ekipet e zjarrfikësve teksa luftonin dëshpërimisht me flakët. Ekipet e shpëtimit kanë paralajmëruar se numri i viktimave mund të rritet ende ndërsa operacionet e kërkim-shpëtimit vazhdojnë. Zelensky e akuzoi Putinin se po tallej Trumpin, pasi sulmet ndodhën vetëm pak ditë pasi lideri amerikan shpalli një armëpushim në sektorin e energjisë. "Ky ishte një sulm i qëllimshëm që kishte në shënjestër pikërisht objektet energjetike, në një kohë kur Presidenti i Amerikës ka bërë thirrje për armëpushim. Rusia nuk ka treguar kurrë më parë një mungesë respekti kaq të hapur dhe sfiduese ndaj Shteteve të Bashkuara. Rusia nuk i konsideron si të fuqishme deklaratat e Presidentit të Amerikës", tha Zelenski.