Moldavia duhet të pajiset me armë të standartit të NATO-s me qëllim që ta ndihmojmë atë të mbrohet përballë kërcënimit të një pushtimi rus. Kështu deklaroi të shtunën sekretarja e jashtme britanike Liz Truss. Ajo tha për të përditshmen britanike Telegraph se bisedimet kanë nisur me aleatët se si të ndihmohen vendet më të vogla që të mbrojnë veten. Ajo tha se është e qartë se pavarësisht suksesit të kufizuar në Ukrainë, presidenti Vladimir Putin ka ambicje për krijimin e Rusisë së Madhe. Moldavia, dikur republikë sovjetike, gjendet në kufirin jugperëndimor të Ukrainës. Ajo nuk ndan kufi me rusinë por është pranë disa rajoneve tashmë nën kontrollin e forcave ruse në jug të Ukrainës. Moldavia nuk është vend anëtar në NATO edhe pse ka aplikuar për tu anëtarësuar në Bashkimin Evropian, më pak se dy javë pas pushtimit të Ukrainës. Truss tha se diskutimet për rritjen e kapaciteteve të ardhshme mbrojtëse të Ukrainës, për të zbrapsuir agresione të ardhshme, duhet të mbulojnë edhe vende të tjera vulnerabël si Moldavia. “Unë dua ta shoh moldavinë të pajisur me armë të standarteve të NATO-s”, tha ajo. “Ky është një diskutim të cilin ne e kemi nisur me aleatët tanë”.