Teksa ‘sëmundja’ e lobimeve në SHBA duket se ka prekur edhe politikanët në Kosovë, e për më saktë kryeministrin Albin Kurti, do të sjellim një përmbledhje të lobimeve të politikanëve shqiptarë në Uashington. Sipas të dhënave të siguruara nga raportet e Departamentit të Drejtësisë, në 2007 ishte qeveria “Berisha” që nënshkroi një kontratë 500 mijë dollarë me kompaninë “Euro “Ridge, që drejtohej nga Tom Ridge, ish-Sekretari për Sigurinë e Brendshme në Shtetet e Bashkuara. Më, pas ky “virus” u përhap dhe në partitë politike. Lobimet më të forta janë kryer rreth vitit 2009, i cili ishte dhe vit elektoral. Në këtë vit LSI ka paguar 154.298 dollarë, PD 120.000 dollarë, PS 82.250 dollarë, ndërsa qeveria “Berisha” rreth 825,000 dollarë. Në këtë periudhë PD e drejtuar nga Berisha ka firmosur një kontratë me “BKSH & Associates”. Kjo firmë është kujdesur që zyrtarët e PD, si Berisha, Topalli e emra të tjerë të kenë takime me personazhe të njohur në SHBA. Ndërsa PS ka lobuar përmes “Rasky Baerlein Strategic Communications”. Ajo që bie në sy është se LSI ka shpenzuar më shumë para nga të gjithë për të lobuar. Në atë kohë drejtohej nga Ilir Meta dhe pas zgjedhjeve u bë koalicioni i famshëm Meta-Berisha. LSI ka pasur një marrëveshje me “Dutko Worldwide”.