Drejtori i përgjithshëm i Policisë së Kosovës, Samedin Mehmeti së bashku me drejtuesit më të lartë të policisë, priti në një takim Drejtorin e Përgjithshëm të Policisë Shqiptare, Ardi Veliu dhe bashkëpunëtorët e tij. Siç thuhet në njoftimin e Policisë, gjatë takimit, Drejtori i Përgjithshëm Mehmeti, i uroi mirëseardhjen përfaqësuesve tw Policisw Shqiptare dhe theksoi se e vlerëson lart bashkëpunimin mes dy institucioneve në të gjitha fushat e sigurisë dhe jo vetëm. Qëllimi kryesor i takimit ishte shkëmbimi i eksperiencave të deritanishme, procedurave të punës që përdorin policitë e dy vendeve, më konkretisht shkëmbimin e ekspertizës lidhur me sistemet elektronike, bazat e të dhënave në përdorim, si dhe çështje të tjera të rëndësishme të bashkëpunimit dhe ndërveprimit mes policive të të dyja vendeve. Pas një prezantimi të bërë nga Policia e Kosovës për punën dhe funksionimin e sistemit të menaxhimit të informacionit të burimeve të policisë, palët u zotuan për vazhdim të bashkëpunimit të ndërsjellë në fushën e sigurisë si dhe mbështetjen në fusha specifike mes dy institucioneve policore.