Ish kryeprokurori Adriatik Llalla është arratisur nga Shqipëria. Lajmi u bë me dije nga policia e Tiranës, ku menjëherë pas kontrolit në banesën e tij ka njoftuar SPAK në lidhje me këtë cështje. Policia njoftoi se ka bërë të gjitha kërkimet dhe verifikimet e mundshme dhe rezulton se ish kryeprokurori është larguar nga Shqipëria, ndaj i ka kërkuar SPAK të nisë hetimet e duhura dhe ta shpallë Llallën në kërkim ndërkombëtar. Arratia e ish kryeprokurorit vjen pak ditë pas shpalljes së vendimit në gjykatë për dënimin e tij me dy vite burg dhe për t’i konfiskuar pasurinë. Ish Prokurori i Përgjithshëm është dënuar me 2 vjet burgim, pasi u shpall fajtor nën akuzat për “fshehje dhe mosdeklarim të pasurisë”. Sipas vendimit të lënë në fuqi nga GJKOK do të konfiskohen edhe disa prona të vëna më parë nën sekuestro, përkatësisht 4 sipërfaqe toke, gjithsej 22 mijë metra katrore dhe 1 apartament në Durrës. Gjithashtu Llalla është i pari ish zyrtar i lartë nga Shqipëria, ndaj të cilit Departamenti Amerikan i Shtetit mori në vitin 2018 vendimin për t’i ndaluar hyrjen në Shtetet e Bashkuara, së bashku me familjen, për shkak të përfshirjes në korrupsion.