Serbia do t’i paguajë qytetarët e saj që do të vaksinohen kundër koronavirusit, në përpjekje për të përshpejtuar fushatën e vaksinimit. Presidenti Aleksandar Vuçiç, teksa shpalli planin, tha se rritja ekonomike varet nga vaksinimi i popullsisë. Sipas programit stimulues, Qeveria do të paguajë 3,000 dinarë, ose 30 dollarë për këdo që merr të paktën një dozë të vaksinës deri në fund të majit. Mesatarisht, serbët fitojnë pak më shumë se 600 dollarë në muaj. Vuçiç tha se qeveria nuk mund t’i diskriminojë njerëzit në bazë të vaksinimit, por ai i përshkroi ata që refuzojnë të marrin vaksinën si “të papërgjegjshëm dhe egoistë”. “Kjo është arsyeja përse kemi menduar t'i shpërblejmë njerëzit që tregojnë përgjegjësi”, tha ai. Vuçiç tha gjithashtu se punonjësit shtetërorë, të cilët nuk janë të vaksinuar dhe sëmuren me koronavirus, nuk do të mund të marrin leje me pagesë. Serbia renditet në mesin e vendeve me vaksinimin më të madh të popullsisë, por si kudo tjetër ritmi i administrimit të dozave ka rënë gjatë javëve të fundit. Sipas shifrave të Qeverisë serbe, 1.3 milion njerëz janë vaksinuar plotësisht me vaksinat Sinopharm, Pfizer, Sputnik V ose AstraZeneca. Serbia ka një popullsi prej rreth 7 milionë banorësh. Deri më tani në Serbi kanë rezultuar pozitivë me Covid 19 mbi 695 mijë persona, ku vetëm të mërkurën u konfirmuan si të prekur, 1402 persona, ndërsa numri i viktimave që nga fillimi i pandemisë ka ashkuar në 6478 persona.