Një person i armatosur është qëlluar nga agjentët e FBI pas një përplasjeje që zgjati për disa orë në portën kryesore të zyrave qendrore të CIA-s. Personi i paidentifikuar është penguar të kalojë portën kryesore për të hyrë në territorin e CIA-s pranë Uashingtonit. Personeli i sigurisë raportohet se është përpjekur të negociojë me personin, që ai të dorëzohet, për disa orë. FBI tha në një deklaratë se individi kishte dalë nga makina e tij me një armë dhe kishte shkëmbyer zjarr me oficerët. “Subjekti u plagos dhe u transportua për në një spital të afërt për kujdes mjekësor”, thuhej në deklaratë. Më herët, një zëdhënë si CIA-s tha se ishin në dijeni të situatës jashtë perimetrit të sigurisë, disa qindra metra nga ndërtesa kryesore e agjencisë. Siguria është rritur shumë vitet e fundit në CIA, e cila është e vendosur në Langley të Virxhinias, pranë një rruge të shumëfrekuentuar. Në 1993, një pakistanez, Mir Aimal Kansi, qëlloi për vdekje dy punonjës të agjencisë dhe plagosi tre të tjerë që ishin ulur në makinat e tyre, në pritje të hapjes së semaforit për të hyrë në territorin e CIA-s. Kansi kishte mundur të largohej drejt Pakistanit dhe u gjet dhe u arrestua vetëm katër vite më vonë. Ai u ekstradua në SHBA ku u dënua për vrasje dhe u dënua me vdekje. Ai u ekzekutua në 2002.