Mashtrimet fiskale dhe krijimi i evazionit fiskal si pasojë e llogarive bankare të krijuara në vende të huaja prej kohësh rrisin barrën mbi tatimpaguesit e ndershëm. Veprimtaria e evazorëve jo vetëm zvogëlon të ardhurat publike, por dhe dobëson besimin në drejtësinë e sistemit tatimor. Si pasojë, sipas miratimeve të ndryshimeve në kuadrin ligjor, bankat duhet të raportojnë tek autoritetet e tyre tatimore informacione në lidhje me mbajtësit e llogarive bankare, të cilët janë rezidentë të shteteve të tjera. Drejtoria e Përgjithshme e Tatimeve, ka bërë publike datën 30 maj si afatin e fundit kur të gjitha institucionet financiare, banka dhe jo banka duhet të kryejnë procesin, që njihet si shkëmbimin automatik i informacionit. Ky proces raporti bëhet për të luftuar problemin e evazionit fiskal offshore dhe për të shmangur grumbullimin e parave jashtë vendit. Sipas standardit, një gamë e gjerë e informacionit do të shkëmbehet mbi llogaritë offshore, duke përfshirë balancat e llogarive dhe të pronësisë. Kjo do të bëjë të mundur parandalimin e evazionit fiskal dhe trajtimin e mashtrimit fiskal. Informacioni që do të shkëmbehet përfshin balancat e llogarive financiare në fund të vitit që raportohet, fitimet kapitale (përfshirë interesat, dividendët, të drejtat dhe të ardhurat nga shitja e aseteve financiare), të raportuara te qeveritë nga institucionet financiare, duke mbuluar llogaritë e mbajtura nga individët dhe entitetet përfshirë dhe fondacionet.