Prodhimi i Brendshëm Bruto i Shqipërisë në dy vitet e fundit është rritur me shifra ndër më të lartat në rajon. Në 2021, rritja u ndal në 8.9 për qind, e treta në rajon pas Malit të Zi dhe Kosovës. Në 2022, sipas të dhënave të Bankës Botërore rritja ekonomike ishte 4.8 për qind dhe këtë vit parashikohet në 3.6 për qind. Megjithatë, hovi i zgjerimit të ekonomisë pas tre krizave të njëpasnjëshme, siç ishte tërmeti, pandemia dhe ajo e çmimeve po dështon që të rrisë mirëqënien e qytetarëve me të njëjtat ritme si PBB-ja. Të dhënat e Eurostat tregojnë se Shqipëria është e fundit në rajon sa u takon dy treguesve kryesorë të mirëqënies, të ardhurat për frymë në raport me PBB dhe fuqisë blerëse. Eurostat krahason këta dy tregues të vendeve të Ballkanit Perëndimor, me përjashtim të Kosovës për të cilën nuk ka të dhëna, me mesataren e vendeve të Bashkimit Europian. Në të dyja rastet, Shqipëria renditet e fundit.