Presidentja e Republikës së Kosovës, Vjosa Osmani zhvilloi një takim me ambasadorët e vendeve të QUINT-it dhe atë të Bashkimit Europian, për të diskutuar zhvillimet e fundit në vend, pas sulmit terrorist ndaj infrastrukturës së Kosovës. Gjatë takimit, Osmani nënvizoi edhe njëherë cenimin që i është bërë sigurisë kombëtare të Kosovës përmes sulmeve në infrastrukturën vitale. Në takim u diskutua gjithashtu edhe për reagimin e institucioneve përgjegjëse rreth kësaj situate, Në të njëjtën kohë, sipas njoftimit të Presidencës, Osmani theksoi se sulmet sikurse ky i fundit synojnë jo vetëm destabilizimin e Kosovës, por paraqesin rrezik serioz për stabilitetin e gjithë rajonit. Ajo i bëri thirrje bashkësisë ndërkombëtare që ta dënojë këtë sulm terrorist dhe të qëndrojë e bashkuar kundër çdo përpjekjeje për të minuar paqen dhe sigurinë në Kosovë. Po ashtu, ajo ritheksoi se parandalimi i sulmeve të tilla në të ardhmen duhet të jetë fokusi kryesor. Osmani pati dhe një takim me komandatin e KFOR-it. Nga shpërthimi pati dëme të shumta materiale në kanalin e ujit Ibër-Lepenc, duke rrezikuar mosfurnizimin në zonat e banuara.