SPAK i kërkon Gjykatës së Posaçme të Shkallës së Parë për Korrupsionin dhe Krimin e Organizuar konfiskimin dhe kalimin në favor të shtetit të pasurive të një grupi kriminal që merrej me trafikimin e lëndëve narkotike nga Shqipëria drejt Italisë ku dhe më pas droga tregtohej. Konkretisht bëhet fjalë për : 43 (dyzetetre) automjete, 4 (katër) motomjete, 18 (tetëmbëdhjetë) pasuri të paluajtshme, 25 (njëzetepesë) subjekte tregtare si; SH.P.K (Shoqëri me Përgjegjësi të Kufizuar) dhe P.F (Person Fizik), 6 (gjashtë) shoqëri aksionere. Llogari bankare në të gjitha bankat e nivelit të dytë të personave të hetuar si dhe familjarëve. Procedimi pasuror ndaj Fael Mukës, Xhulio Kastratit, Kledjon Mucollarit, Ervis Vangjelit, Kristian Ibrahimajt, Alban Mahilajt, Klaudia Sulejmanit, Besmir Selamajt, Altin Ymerajt, Mark Lisit, Ani Kucit, Daniel Elezit, Erando Marës, Indrit Kolgjokajt, Endri Sercanit si dhe personave të tjerë të hetuar në kuadër të këtij hetimi penal si dhe familjarëve të tyre nisi në janar të vitit 2024. Kjo pasi ata dyshohet se i kishin vendosur të ardhurat si rrjedhojë e veprimtarisë kriminale. Grupi u shkatërrua pas hetimeve të kryera në bashkëpunim me prokurorinë e Firences dhe Eurjust. Aksioni i koduar Muratori u zhvillua në shkurt të vitit 2024 ndërsa u ekzekutuan 92 masa sigurimi, 65 prej të cilave ishin për shtetas shqiptarë. Sipas SPAK, grupi të ardhurat që përfitonte nga trafiku i drogës i investonte në Shqipëri.