Sinan Tafaj, Dhimitrula Spiro dhe Saimir Vishaj janë ndaluar nga Këshilli i Emërimeve në Drejtësi, që të vazhdojnë garën e tyre si kandidatë për anëtarë të Gjykatës Kushtetuese. Në arsyetimin e KED lidhur me vendimin e marrë, këto tre kandidatë nuk plotësonin kushtet për të qenë pjesë e Gjykatës Kushtetuese. "Këshilli i Emërimeve në Drejtësi, pasi shqyrtoi aktet dhe procedurën e ndjekur për verifikimin e kandidaturave dhe dokumentacionin e përgatitur lidhur me plotësimin e kushteve ligjore për kandidim, për secilin kandidat të përcaktuar në rendin e ditës, pasi dëgjoi mendimin e Avokatit të Popullit lidhur me procedurën e ndjekur në verifikimin e kandidaturave, vendosi: Ndalimin e kandidimit dhe mos vijimin e procedurës së verifikimit, vlerësimit, pikëzimit dhe renditjes të kandidatëve për gjyqtar në Gjykatën Kushtetuese të: Sinan Tafajt, për vendin vakant të Vitore Tushës dhe vendin vakant të Gani Dizdarit; Dhimitrula Spiro, për vendin vakant të Vitore Tushës dhe të Z. Fatmir Hoxhës; Saimir Vishajn, për vendin vakant të Vitore Tushës, të Gani Dizdarit dhe të Z. Fatmir Hoxhës. Kandidatët për të cilët është vendosur ndalimi, kanë patur mangësi të një apo disa kushteve të parashikuara nga Kushtetuta dhe ligji", thuhet në njoftimin e KED-së. 3 kandidiatë e larguar kanë të drejtën e ankimit në Apel, brenda 5 ditëve nga dita e publikimit të vendimit të arsyetuar. Aktualisht Gjykata Kushtetuese ka 7 anëtarë, 6 me mandat të plotë, ndërsa duhen 9 të tillë që kjo Gjykatë të quhet e kompletuar.