Kryeministri grek, Kyriakos Mitsotakis dhe presidenti turk, Recep Tayyip Erdogan, kanë diskutuar për situatën në Afganistan, teksa rriten shqetësimet për valë të re të migrantëve në Evropë. “Bashkimi Evropian duhet t’i ndihmojë afganët në Afganistan dhe shtetet fqinje, sidomos Iranin, përndryshe vala e emigrantëve do të jetë e “pashmangshme”, i ka thënë Erdogan liderit grek, përmes një bisede telefonike. Erdogan ka thënë se nëse nuk krijohet stabilitet në Afganistan, pas pushtimit të talebanëve në fundjavën e kaluar, presioni veçse i lartë i migrimit do të rritet dhe situata do të përbëjë “sfidë serioze për secilin”. Ndërsa Mitsotakis ka thënë se fqinjët e Afganistanit duhet të mbështeten në mënyrë që afganët “të qëndrojnë sa më afër shtëpive të tyre. Pushtimi i talebanëve në Afganistan, kanë rritur shqetësimet në Evropë për përsëritje të krizës së emigrantëve ashtu si ndodhi në 2015, kur më shumë se një milion persona u larguan nga lufta dhe varfëria në Lindjen e Mesme, përmes Greqisë nga Turqia, para se të udhëtonin drejt shteteve më të pasura. Turqia strehon gati katër milionë refugjatë sirianë dhe 300,000 afganë, përveç emigrantëve dhe refugjatëve nga pjesë të tjera të botës. Greqia ka qenë në ballë të krizës evropiane me emigrantë, ndonëse mbërritjet atje nga Turqia kanë rënë nga viti 2016, kur Bashkimi Evropian ka arritur marrëveshje me Ankaranë për të zvogëluar valën e migrimit në këmbim të miliarda dollarëve si ndihmë financiare dhe udhëtim pa viza për shtetasit turq në bllokun evropian.. “Turqia nuk ka mision, përgjegjësi dhe obligim që të jetë strehim për refugjatët e Evropës. Neve na duhet t’ua kujtojmë miqve evropianë faktin se Evropa nuk mund të qëndrojë larg këtij problemi duke mbyllur kufijtë për të mbrojtur mirëqenien e qytetarëve të vet’”, ka thënë Erdogan pak ditë më parë. Turqia dhe Greqia kanë ashpërsuar së fundmi masat në kufijtë e tyre. Turqia ka filluar ngritjen mureve në kufi me Iranin, si dhe të sistemeve elektronike të vëzhgimit, pas shqetësimeve në rritje për refugjatët afganë. Nga ana tjetër edhe Greqia në gjendje gatishmërie për të parandaluar një krizë të re migrantësh dhe se tashmë ka përfunduar krijimin e gardhi 40 kilometra të gjatë me Turqinë, si dhe një sistem vëzhgimi për të ndaluar hyrjen e azilkërkuesve. “Nuk mund të presim në mënyrë pasive për ndikimin e mundshëm. Kufijtë tanë do të pacenueshëm”, ka thënë ministri grek për Mbrojtjen të Qytetarëve.