Të paktën 7 persona kanë rënë në prangat e policisë italiane nën akuzën e trafikut të drogës, në mesin e të cilëve edhe shtetas shqiptarë. Operacioni policor që coi në arrestimin e bandës kriminale, u finalizua pas disa muajsh hetime të thelluara, nga Skuadra Lëvizëse e Raguzës në bashkëpunim me Prokurorinë Publike vendase. Kapja e grupit erdhi si pasojë e monitorimit të vazhdueshëm nga efektivët e policisë si dhe nga përgjimet ambientale që vepronin kryesisht në provincën e Raguzës. Mediat italine shkruajnë se shqiptarët dhe italianët trafikonin hashash, marijuanë dhe kokainë. Grupi kriminal furnizohej me drogë nga Roma, Palermo, Katania dhe nga territori shqiptar. Gjatë kontrolleve të bëra në banesat e tyre, policia gjeti dhe sekuestroi 2.6 kilogramë kokainë, pastërtia e së cilës rezultoi në masën 80%, 77 kilogram marijuanë dhe 50 kilogramë hashash. Të gjithë të arrestuarit janë lënë në arrest me burg. Droga e sekuestruar, përveç sasive të negociuara me marrëveshje telefonike, do të kishte sjellë fitime të konsiderueshme, të vlerësuara në rreth 1 milion euro, veçanërisht për drogën e llojit kokainë, e cila, pasi të pritej, do të arrinte në sasi më të mëdha.