Ky është lokali në hyrje të qytetit të Lushnjes ku reklamohej 6 muaj më parë pasurimi i shpejtë përmes dy posterave të afishuar që promovonin investimet në platformën mashtruese XUEX. Top Channel ka siguruar dosjen hetimore se si u godit grupi që mashtronte qytetarët përmes piramidave on line. Në këtë lokal që u bë pikënisja e hetimeve, agjentët trokitën si klientë dhe investitorë të gatshëm për tu bërë pjesë e skemës. Të parët që dhanë informacione ishin kamerierët e arrestuar, Emanuel Taullau, Flavio Mukaj, por më pas në pranga ra edhe Arbër Çela, pronari i lokalit. Kamerieri Taullau është personi që i tregon agjentit të policisë se për tu bërë pjesë e skemës duhet të investosh të paktën 1 mijë euro. Në dosje përmendet si organizator edhe Ereledio Shebeku i shpallur në kërkim dhe që rezulton të jetë personi kyc që kontrollonte skemën. Në kontakt me agjentin e policisë, Ereledio kishte shprehur frikën për vijimin e aktivitetit pas denoncimit publik të bërë nga deputeti Erjon Braçe. Agjentët e policisë faktuan me zë e figurë se komunikimet e skëmës që ka mashtruar qindra shqiptarë bëheshin përmes platformës Telegram. Në momentin që investoje bëheshe pjesë e grupit dhe arrije të komunikoje direkt me profesorin, një person i identifikuar si “Leo Smith”. Ky i fundit i ftonte të gjithë anëtarët e grupit që të futen në këtë platformë në orën 14:20 dhe në orën 19:20 çdo dite, duke i kërkuar që t’i bëjnë “like” faqeve që ju dërgon ky shtetas në aplikacionin “Telegram”. Kaq mjaftonte që paratë e investuara fillimisht të rriteshin 1% në ditë. Dhe brenda 45 ditësh secili prej tyre mund edhe t’i tërhiqnin. E përfshirë në këtë skemë rezulton të jetë edhe një punonjëse e Bashkisë së Divjakës, bashkë me familjarë të sajët. Nga hetimet rezulton se aplikacioni i XUEX nuk ekzistonte në App apo Play Store, por vinte si një aplikacion i bazuar në një link, që instalohej në telefon. Pasi kishe kaluar paratë në llogarinë e tyre mund të hyje në grupin e Telegramit ku ishin të gjithë përdoruesit, gati për të rënë pre e mashtrimit.