Dy postera të afishuara në një lokal në hyrje të Lushnjës reklamonin pasurimin e shpejtë në platformën mashtruese XUEX, duke bërë që shumë qytetar nga kjo zonë por dhe Divjaka apo qytete të tjera të vraponin për t’u bërë pjesë e saj.. Në dosjen hetimore, të siguruar nga Top Channel, zbardhen të gjitha hetimet se si u godit grupi I mashtruesve. Agjentët trokitën në këtë lokal në pronësi të Arbër Çelës dhe u shfaqën si investitorë. Ata që dhanë informacion për këtë investim ishin kamarierët që u prangosën gjatë aksionit të zhvilluar pak ditë më parë, Emanuek Taullau dhe Flavio Mukaj. Sipas dosjes hetimore, Taullau ishte personi që I tregoi agjentit të policisë se duhet të investonte fillimisht të paktën 1 mijë euro. Aplikacioni nuk gjendej në Appstorë dhe PlayStorë, por instalohej përmes një linku në telefon e më pas përdoruesit bëheshin pjesë e një grupi në Telegram ku çdo ditë, në orën 14:20 dhe në orën 19:20, ata I bënin like faqeve që u dërgonte një person I quajtur Leo Smith në aplikacion. Kaq mjaftonte që paratë e investuara fillimisht të rriteshin 1% në ditë. Dhe brenda 45 ditësh, secili prej tyre mund t’i tërhiqte. E përfshirë në këtë skemë rezulton të jetë edhe një punonjëse e Bashkisë së Divjakës, bashkë me familjarë të saj. Në dosje, përmendet si organizator edhe Ereledio Shebeku, i shpallur në kërkim dhe që rezulton të jetë personi kyç që kontrollonte skemën. Në kontakt me agjentin e policisë, Ereledio kishte shprehur frikën për vijimin e aktivitetit pas denoncimit publik të bërë nga deputeti Erjon Braçe.