Presidenti i Ukrainës, Volodymyr Zelensky ka kërkuar nga vendet europiane të ndërmarrin hapa konkretë drejt krijimit të një sistemi të përbashkët të mbrojtjes ajrore, pas një tjetër sulmi të rëndë rus ndaj qytetit të Zaporizhjës, ku u plagosën të paktën 13 civilë, përfshirë dy fëmijë. Në një postim në rrjetet sociale, Zelensky akuzoi Rusinë për sulme të qëllimshme ndaj civilëve, duke theksuar se raketat janë lëshuar për të terrorizuar popullin dhe kanë shkaktuar dëme të mëdha në infrastrukturën e banimit. Ai bëri të ditur se vetëm që nga fillimi i shtatorit, Rusia ka lëshuar mbi 3.500 dronë, afro 190 raketa dhe më shumë se 2.500 bomba ajrore kundër objektivave brenda Ukrainës, duke përmendur edhe provokime të drejtpërdrejta ndaj vendeve partnere. “Tani është koha të zbatojmë mbrojtjen e përbashkët të qiellit evropian me një sistem të shumëfishtë të mbrojtjes ajrore. Të gjitha teknologjitë për këtë ekzistojnë tashmë”, shprehet më tej Zelensky. Presidenti ukrainas nënvizoi se teknologjitë për një sistem të tillë ekzistojnë, por kërkohen investime, vendosmëri dhe vendime të qarta nga të gjithë partnerët perëndimorë.