Shtetet e Bashkuara janë të zhgënjyera me bllokadën që Bullgaria po i bën integrimit evropian të Maqedonisë së Veriut deklaroi ambasadorja e SHBA-së në Shkup, Kate Byrnes. Në një intervistë për Televizionin Telma në Maqedoninë e Veriut, ajo tha se mosmarrëveshjet dypalëshe duhet të zgjidhen jashtë procesit të integrimit dhe vuri në dukje se Uashingtoni e kishte bërë shumë të qartë se dëshironte të shihte mbajtjen e një konference ndërqeveritare të BE-së me Maqedoninë e Veriut, deri në fund të këtij viti. “Ne e shohim anëtarësimin e Maqedonisë së Veriut në BE si një interes të përbashkët”, tha Byrnes. Bullgaria ka bllokuar nisjen e bisedimeve për anëtarësimin e Maqedonisë së Veriut në Bashkimin Evropian, pasi kërkon që Shkupi të pranojë se si identiteti, ashtu edhe gjuha e saj kanë rrënjë bullgare. Presidenti maqedonas, Stevo Pendarovski tha ditë më parë, në një intervistë për televizionin austriak ORF, se kërkesat bullgare janë “përtej mendjes së shëndoshë”. Maqedonia e Veriut mbetet e qëndrimit se maqedonishtja është një gjuhë e veçantë sllavo-jugore që përbëhet nga pjesë të kulturës dhe identitetit kombëtar të vendit. Zyrtarët maqedonas thonë se për çështjet e identitetit nuk do të pranojnë asnjëherë të bisedojnë me Bullgarinë.