Shqipëria mund të prekë vijën e finishit të bashkimit europian brenda vitit 2027. Kështu deklaroi komisioneria për zgjerimin, Marta Kos gjatë një interviste për mediat sllovene; duke shtuar se nga vendet ballkanike në vend të parë qëndron Mali i Zi për mbylljen e negociatave, dhe në vend të dytë Shqipëria. “Dy vende janë në krye, njëri është Mali i Zi, me të cilin negociatat mund të përfundojnë në fund të vitit 2026. Tashmë i kemi hapur të gjithë kapitujt me Malin e Zi dhe po mbyllen gradualisht. Aktualisht, Shqipëria është në vendin e dytë, e cila mund të kalojë vijën e finishit në fund të vitit 2027. Aktualisht, afërsisht një mijë njerëz punojnë për një vend në Bruksel, nga të gjitha fushat. Këto janë aftësi teknike, por në fund vendimi do të merret nga shtetet anëtare.” – deklaroi komisioneria e zgjerimit për mediat sllovene. Marta Kos u ndal tek Serbia dhe rruga e saj europiane kur i cilësoi të papranueshme akuzat e presidentit Aleksandër Vuçiç se organizatat joqeveritare të financuara nga Komisioni Europian, po trondisin tani pushtetin e tij. “Organizatat Joqeveritare në Serbi nuk do të mbijetonin pa ndihmën tonë, dhe pikërisht për shkak të rëndësisë së jashtëzakonshme të tyre, është vendosur që do të marrin 16 milionë euro shtesë për periudhën nga ky vit deri në fund të vitit 2027. Nuk mund ta imagjinoj që procesi i negociatave me Serbinë të zhvillohet pa pjesëmarrjen e shoqërisë civile dhe këtë ia kam bërë shumë të qartë Vuçiç-it.” – deklaroi komisionerja Kos.