Është vënë në pranga ish-drejtori i Radio Televizionit Shqiptar, Thoma Gëllçi dhe 3 ish-zyrtarë të këtij televizioni. Në një njoftim për media, SPAK ka bërë me dije se Gëllçi akuzohet për “Shkelje të barazisë së pjesëmarrëse në tendera apo ankande publike”. Sipas burime bëhet fjalë për tenderin për blerjen e pajisjeve për kanalin RTSH Agro me vlerë rreth 87 milionë lekë të reja, tender ky i bërë në datën 9 nëntor të 2018 nga RTSH. Nga burimet bëhet me dije se 3 anëtarët e tjerë të cilët janë vënë në pranga janë Alban Malaveci, Ervin Muraj dhe Julian Tapia, të cilët akuzohen për veprën penale “Shkelja e barazisë në tendera apo ankande publike”, kryer në bashkëpunim. Nga hetimet ka rezultuar se krahas tyre edhe Gëllçi në postin e Drejtorit të Përgjithshëm të RTSH, ka shpërdoruar detyrën në këtë proçedurë prokurimi. SPAK e ka regjistruar proçedimin penal për këtë tender në datën 28 shkurt të 2020. Pas hetimeve u vërtetuan shkeljet dhe mbrëmjen e kësaj të premte SPAK ka bërë arrestimin e tyre, pasi GJKKO ka caktuar masën e sigurisë “Arrest me Burg’.