Supozohej se ai do të ishte mjeti i pathyeshëm i komunikimit i botës së krimit, një hapësirë e sigurt digjitale ku do të komplotoheshin krime që variojnë nga trafiku i drogës e deri tek vrasjet, larg syve të rendit. Por, për rreth tre vite, një aplikacion i koduar i përdorur nga kriminelët por i monitoruar në vijimësi nga FBI dhe policia federale australiane, ka cuar në qindra arrestime dhe dhjetëra e miliona dollarë në asete të konfiskuara. Agjencitë e ruajtjes së rendit thonë se kanë arrestuar me qindra kriminelë në të gjithë botën në përmbyllje të një operacioni tre vjecar, duke përdorur një aplikacion mesazhesh të sigurta të krijuar nga FBI. Operacioni i kryer në bashkëpunim mes australisë dhe FBI-së, bëri që aplikacioni ANOM, të shpërndahej në mënyrë të fshehtë mes kriminelëve duke lejuar policinë të monitoronte bisedat, pa dijeninë e tyre. Operacioni coi në arrestime në 18 vende të botës. Ata përfshijnë persona të lidhur me mafien dhe grupet e krimit të organizuar. Droga, armë dhe para kesh janë konfirkuar po ashtu. Australia tha se ka arrestuar 224 persona në kuadër të operacionit dhe ka reaguar ndaj 20 kërcënimeve për vrasje, duke shpëtuar kështu jetët e një numri domethënës kalimtarësh të pafajshëm. Kryeministri i vendit e quajti operacionin të jashtëzakonshëm dhe tha se ai kishte goditur kriminelët në shkallë globale. Zelanda e re, që ka arrestuar 35 persona, e quajti operacionin veprimin më të sofistikuar të agjencive të rendit në botë, kundër krimit të organizuar, deri më sot. FBI dhe Europol do të japin më shumë detaje në vijim.