Aleanca Kosovare e Bizneseve raporton se brenda një viti në Kosovë, mbyllen mesatarisht dy mijë biznese, dhe se rreth tetë mijë biznese të tjera të reja që hapen po në këtë periudhë kohore. Sipas Aleancës, gjendja e bizneseve në Kosovë konsiderohet e brishtë, pasi mbyllja e tyre ka ardhur në rritje kohëve të fundit. Shkaqet e shuarjes së bizneseve, sipas analistëve janë nga më të ndryshmet. Sipas tyre bizneset nuk kanë mbështetje, interesi bankar është i lartë, infrastruktura është e shtrenjtë, duke përfshirë qiranë, energjinë elektrike. Aleanca bën me dije po ashtu se, mungesa e fuqisë punëtore dhe fuqia e konkurrencës janë të tjera arsye që kanë cuar në mbyllje të bizneseve. Këto shifra të shuarjes së bizneseve për ekonominë e Kosovës janë alarmante, sipas ekonomistëve. Sipas Agjencisë së Regjistrimit të Bizneseve në Kosovë, nga marsi i vitit 2021 deri në shtator të këtij viti në Kosovë janë regjistruar mbi 40 mijë biznese. Ndërsa kërkesat për çregjistrimin e bizneseve numërohen mbi 5 mijë, ose rreth 8 për qind.