Vijojnë kontrollet intensive në të gjitha rrugët e vendit me qëllim parandalimin dhe ndëshkimin e drejtuesve të mjeteve për shkelje të ndryshme të kodit rrugor. Përmes një njoftimi zyrtarë, policia rrugore ka bërë me dije se gjatë 48 orëve të fundit, janë arrestuar në flagrancë 16 drejtues mjetesh dhe motomjetesh, nga të cilët 7 për drejtim mjeti pa leje drejtimi dhe 9 për drejtim mjeti në gjendje të dehur. Po gjatë këtij harku kohorë, janë pezulluar 89 leje drejtimi, nga të cilat 60 për shpejtësi mbi normat e lejuara, 27 për drejtim mjeti nën efektin e alkoolit apo në gjendje të dehur dhe 2 për qarkullim në sens të kundërt. Duke përdorur dronë, radarë, kamera, aparate fotografike e alkooltestues, uniformat blu kanë ndëshkuar me masë administrative, në të gjithë vendin, 2 mijë e 378 drejtues mjetesh, për shkelje që janë rrezik potencial për përfshirje në ngjarje rrugore. Nga ana tjetër, policia rrugore e Tiranës, gjatë kontrolleve parandaluese, në rrugën “Jordan Misja”, ka goditur një rast të mitëdhënies. Një drejtues mjeti, pasi është konstatuar duke drejtuar mjetin nën efektin e alkoolit, u ka ofruar punonjësve të Policisë, një kartëmonedhë të prerjes 20 euro, me qëllim shmangien e ndëshkimit.