Shefi i ri i NASA-s po intensifikon përpjekjet për të studiuar më thellësisht objektet fluturuese të paidentifikuara, dhe e bën këtë që në muajin e parë të tij në detyrë. Bill Nelson, ish senator nga Florida dhe veteran i fluturimeve në hapësirë, tha për CNN se nuk është e qartë për askënd, madje as për ata që ndodhen në majat e agjencisë amerikane hapësinore, se cfarë janë objektet shumë të shpejta të pikasura në të shkuarën nga pilotët e marinës. Nelson shtoi se ai nuk besonte se ato objekte ishin jashtëtokësorë që vizitonin tokën. “mendoj se unë do të dija dicka nëse do të ishte kështu”, tha Nelson, por ai pranoi se është e parakohëshme të përjashtosh një mundësi të tillë. Komentet e Nelson i bëjnë jehonë përfundimeve të një raporti të ri të Pentagonit, që do të publikohet më vonë këtë muaj. Pesë burime të afërta me studimin, thanë për CNN se inteligjenca amerikane nuk kishte gjetur asnjë provë se objektet e paidentifikuara ishin anije hapësinore aliene, por hetuesit thanë se nuk kishin një vlerësim përfundimtar të asaj që objektet misterioze mund të ishin. Shefi i ri i NASA-s nuk ka ngritur një task forcë zyrtare për të hetuar objektet e paidentifikuara. Sidoqoftë, ai udhëzoi kërkuesit që të bënin përpara me eksplorimin e kësaj cështjeje.