Një tabelë e bërë vetë në një resort turistik popullor në Norvegjinë verilindore, i kërkon njerëzve të mos urinojnë në drejtim të Rusisë. E shkruar në anglisht, tabela i urdhëron njerëzit të mos e bëjnë këtë, përndryshe do të përballen me një gjobë të majme. Tabela u vendos në breg të Lumit Jakobselva që ndan Norvegjinë dhe Rusinë, përkrah një tabele zyrtare që informon se zona është nën mbikqyrje video nga rojat norvegjeze të kufirit. “Tabela ndoshta është vendosur atje nga njerëz që duan të paralajmërojnë të tjerët që të mos e teprojnë me sjellje të pahijshme”, thanë zyrtarët. Sipas ligjit norvegjez, është e paligjshme të sillesh në mënyrë të pahijshme në kufi, nëse sjelljet e tilla kanë në shënjestër shtetin fqinj apo autoritetet e tij, dhe dënohet me një gjobë prej rreth 290 eurosh. “Urinimi në natyrë nuk është domosdoshmërisht fyes por varet nga këndvështrimi”, thanë zyrtarët. “Nëse ndodh këtu, është e ndëshkueshme nga ligji për sjelljen e pahijshme në kufi”. Sidoqoftë, nuk ka patur asnjëherë një ankesë nga ana e autoriteteve ruse, të paktën deri më tani. Mediat norvegjeze sidoqoftë kanë raportuar incidente në të cilat qytetarët janë gjobitur apo ndaluar nga rojat kufitare për kalim të paligjshëm kufiri ose se kanë hedhur gurë në lum në drejtim të Rusisë.