Drejtuesit e lartë të talebanëve janë mbledhur në Kabul, për të analizuar qeverinë e ardhshme, pas kthimit të grupit islamik në pushtet. Takimi do të zhvillohet teksa talibanët tentojnë të prezantojnë një imazh më të moderuar pas kthimit në pushtet, ndërkohë që forcat e udhëhequra nga Shtetet e Bashkuara evakuohen pas gati dy dekadave të luftës. Një zyrtar i lartë i talibanëve, i ka thënë agjencisë së lajmeve AFP, se bashkëthemeluesi i talibanëve Mullah Abdul Ghani Baradar, do të takohet në Kabul me “liderët xhihadistë dhe politikanët për krijim të një qeverie gjithëpërfshirëse”. Agjencia e lajmeve Reuters, ka cituar ndërkohë një zyrtar taliban të paidentifikuar të ketë thënë se Baradar ka qenë në Afganistan “për të deleguar përgjegjësitë te komandantët, për të takuar liderët e qeverisë paraprake, komandantët e milicive lokale, politikëbërësit dhe dijetarët fetarë”. Ky zyrtar i ka thënë agjencisë së lajmeve se talibanët planifikojnë të krijojnë ekipe të ndara për t’u përballur me sigurinë e brendshme dhe krizën financiare në Afganistan. Në takimin e udhëheqësisë talibane pritet të marrë pjesë edhe një zyrtar i grupit Haqqani, i cili ka lidhje me talebanët dhe është shpallur organizatë terroriste nga Shtetet e Bashkuara. Talibanët kanë premtuar qeverisje “ndryshe” në krahasim me periudhën e fundit kur kanë qenë në pushtet nga 1996-2001, kur kanë udhëhequr përmes një interpretimi të ashpër të ligjit islamik. Me kthimin e grupit militant në pushtet, janë rritur shqetësimet për kthim të mënyrës së ashpër të jetesës për minoritetet fetare dhe gratë, të cilat janë përjashtuar nga jeta publike. Talebanët janë zotuar për amnisti të përgjithshme ndaj secilit që ka punuar me Qeverinë e përkrahur nga SHBA-ja, mirëpo ka pasur raportime se militantët mund të lëndojnë gazetarët si dhe trupat dhe ish-zyrtarët qeveritarë afganë.