Partitë politike në Maqedoninë e Veriut kanë gjetur më në fund gjuhën e kompromisit për datën e zgjedhjeve të parakohshme parlamentare; ato u vendos të mbahen në 15 korrik. Lajmi u bë i ditur nga kryetari i Lidhjes Social-Demokrate, Zoran Zaev, pas një takimi me liderin e opozitës, Hristijan Mickovski. “ Që populli të mos vuajë dhe Mickoski e VMRO-DPMNE-ja ta tregojnë me vepra përgjegjshmërinë e tyre, 15 korrikun e përcaktuam si datën përfundimtare dhe të vetme për mbajtjen e zgjedhjeve, pjesë e të cilave do të jetë dhe opozita. Bisedova përsëri sot me Mickoskin, kërkuan mesin e korrikut, dhe ja ku e kanë”, deklaroi Zaev. Marrëveshjen e konfirmoi dhe kreu VMRO-DPMNE-së, I cili theksoi se kushtet që kishin vendosur, ishin pranuar: së pari protokollet për mbrojtjen e shëndetit të qytetarëve, së dyti misioni I OSBE/ODIHR-së për të mbrojtur vullnetin e tyre. “Maqedonia është në një situatë të keqe, është sulmuar fuqishëm pavarësisht krizës ekonomike dhe të fortë shëndetësore. Që të ndalet e gjithë kjo, ka një rrugëdalje, dhe kjo është humbja bindëse në zgjedhje e Zaevit dhe LSDM-në”, ka shkruar Mickovski në një postim në Facebook. Bashkimi Demokratik për Integrim vlerëson se konsensusi i arritur për datën e zgjedhjeve, ka evituar krizën politike që rrezikonte vendin. Zgjedhjet parlamentare në Maqedoninë e Veriut duhej të mbaheshin më 12 prill, por u anulluan për shkak të pandemisë së koronavirusit dhe gjatë kësaj kohe, vendi ka funksionuar pa parlament, por me qeveri teknike.