Dhuna sërish ka shpërthyer në Lindjen e Mesme, me ushtrinë amerikane që tha se ka kryer raundin e tretë të sulmeve “vetëmbrojtëse” ndaj objektivave në Iran, ndërsa Teherani është kundërpërgjigjur me sulme me raketa dhe dronë ndaj Kuvajtit në orët e para të së hënës. “Komanda Qendrore amerikane ka kryer sulme vetëmbrojtëse ndaj radarëve iranianë dhe qendrave të komandës dhe kontrollit për dronët në Goruk të Iranit dhe në ishullin Keshm gjatë fundjavës”, tha CENTKOM në një deklaratë. Ky është sulmi i tretë “vetëmbrojtës” që SHBA ka thënë se ka kryer ndaj shënjestrave iraniane që kur ka hyrë në fuqi armëpushimi në fillim të prillit. Sulmet e reja vijnë në kohën kur zyrtarët amerikanë dhe iranianë po shkëmbejnë një sërë propozimesh për një kornizë që do të zgjaste armëpushimin aktual edhe për 60 ditë, si dhe potencialisht do të hapte Ngushticën e Hormuzit dhe do të hiqte bllokadën amerikane ndaj porteve iraniane, mes çështjeve të tjera që po diskutohen. CENTCOM tha përmes deklaratës se sulmet ishin, të paktën pjesërisht, në përgjigje të rrëzimit të një droni nga forcat iraniane.