Gjykata e Dibrës ka lënë në burg ditën e sotme dy personat e përfshirë në skemën e korrupsionit në Zyrën Arsimore Dibër, Halit Shehun dhe Fitim Farrukun. Halit Shehu u arrestua pasi i dha një shumë parash Fitim Farrukut, i cili është shefi i Financës së Këshillit të Qarkut që ky të ushtrojë ndikim në Zyrën Vendore Arsimore Dibër në punësimin e Halitit si mësues. Bazuar në gjendjen ekonomike, shoqërore dhe rrethanave të kryerjes së veprës penale, për të është caktuar masa “Arrest në burg”. Sipas dosjes hetimore, 4 ditë më parë Halit Shehu ka biseduar në telefon me Fitim Farrukun, me detyrë punonjës në Këshillin e Qarkut Dibër. Gjatë bisedës Haliti kërkon të punësohet si mësues, por e ka të vështirë dhe kërkon ndihmën e Fitimit, i cili i ka thënë që të marrë dokuemnetet e të takohen sërish . Më pas Haliti komunikon me bashkëshorten dhe ajo i kërkon që të takojë Fitimin, pasi ky i fundit ka miqësi me drejtorët që kanë në dorë punësimin e tij. Bashkëshortja e udhëzon Halitin që t’i japë lekët që ka me vete, rreth 80.000 lekë. Më pas Haliti bashkëbisedon sërish me bashkëshorten, e cila i thotë se ajo punë u mbyll dhe se do të punësohet pasi ai t’ia japë shumën e parave Fitimit. Takimi ëhstë mbajtur në 28 shtator dhe ata janë vënë nën vëzhgim nga policia gjyqësore. Nga përgjimi i bisedave telefonike dhe vëzhgimi i ambientit është parë se Haliti dhe Fitimi janë takuar në një lokal në Dibër dhe Haliti i ka dhënë një zarf, në të cilin dyshohet se janë paratë. Më pas ata janë ndarë me njëri-tjetrin dhe Fitimi është larguar bashkë me zarfin, ndërsa ka telefonuar një person tjetër. At a janë takuar dhe oficerët kanë mbajtur nën vëzhgim takimin e tyre duke I arrestuar. Nga kontrolli personal, ka rezultuar se në zarfin e bardhë të Fitimit janë gjetur 100 mijë lekë. Nnga verifikimi i bërë i personit që po takohej me Fitimin ka rezultuar se është Lulëzim Dani, bashkëshorti i Brikena Danit, e cila është me detyrë Përgjegjëse e Zyrës Arsimore Dibër.