Kriteret që lidhen me integritetin e gjyqtarëve dhe prokurorëve që emërohen në strukturën e posaçme të drejtësisë janë sfiduar në Gjykatën Kushtetuese prej padisë së ngritur nga gjyqtari i Gjykatës së Tiranës, Gerd Hoxha. Gjyqtari Hoxha, që në garën për t’u emëruar në gjykatën e posaçme u skualifikua nga Këshilli i Lartë Gjyqësor, kërkon nga Gjykata Kushtetuese interpretimin e pikës 5 të nenit gjashtë të ligjit për organizimin dhe funksionimin e prokurorisë dhe gjykatës së posaçme. Pika në fjalë ngarkon gjykatën dhe prokurorinë e posaçme për ngritjen e një komisioni vlerësimi për kandidaturat. Komisioni përbëhet nga pesë anëtarë. Para këtij komisioni doli edhe gjyqtari Gerd Hoxha. Në lidhje me kandidaturën e tij për anëtar të GJKKO, i njëjti komision dorëzoi në Këshillin e Lartë Gjyqësor vlerësim negative në lidhje me integritetin. Vlerësimi u bazua vetëm te një foto që ky gjyqtar kishte me kryebashkiakun Erion Veliaj gjatë një aktiviteti zyrtar të Ambasadës Britanike në Tiranë. Vendimi u ankimua nga gjyqtari Hoxha në gjykatën administrative. Kjo e fundit e çoi çështjen për interpretim në Kushtetuese, që pritet të marrë vendim në datën 23 prill.