Në prag të nisjes së mësimit plotësues, Ministrja e Arsimit, Sportit dhe Rinisë Evis Kushi ka kryer vizita inspektimi në shkolla të ndryshme të Tiranës, për të parë nga afër masat e ndërmarra. Gjatë vizitave në shkolla, ministrja ka përsëritur apelin ndaj të gjithë mësuesve të pavaksinuar deri më tani, për t’iu bashkuar fushatës së vaksinimit, në mënyrë që shkollat të kalojnë një vit sa më të mbarë dhe të sigurt. Kushi është shprehur e kënaqur që pjesa më e madhe e tyre në të gjithë Shqipërinë tashmë janë vaksinuar me të dy dozat, gjë që siguron qetësi dhe siguri në rifillimin e mësimit në kushte normale. Deri tani janë inspektuar disa nga shkollat më të mëdha, ndërkohë që edhe në vijim këto inspektime do të vazhdojnë, për të parë nga afër ambientet shkollore, kushtet higjieno-sanitare, si dhe masat e nevojshme për mbrojtjen nga virusi Covid-19.