Kryeministri i Kosovës, Albin Kurti, thotë se është ende në pritje të KFOR-it për heqjen e barrikadave në veri të Kosovës. “Më mirë do të ishte që të hiqen nga ata që i kanë vendosur, por ata që i kanë vendosur ato barrikada janë vendosur edhe vetë mbi barrikada, madje me armatime. Nuk janë këto barrikada civile dhe, në anën tjetër, ne kemi dhënë kohën e kërkuar nga KFOR-i që ai ta heqë barrikadat. Ndaj edhe ministri ynë i brendshëm po pret”, tha Kurti në një intervistë për mediat kosovare. Ai shtoi se barrikadat në veri të Kosovës nuk mund të qëndrojnë aty, “jo vetëm pse shkelin ligjin dhe lëvizjen e lirë, por në të njëjtën kohë edhe për shkak se vetë qytetarët serbë janë të bllokuar”.