Nga pikëpamja politike dhe diplomatike, Shqipëria dhe Britania e Madhe prej vitesh e kanë shtruar rrugën për kthimin e të dënuarve shqiptarë në atdhe; por vendimet gjyqësore shpesh kanë ngadalësuar apo penguar procesin. Ministri i Drejtësisë, Ulsi Manja ka nënshkruar një marrëveshje me palën britanike për transferimin e të dënuarve. Marrëveshja kishte si qëllim kryesor që shtetasit shqiptarë të vuanin pjesën e mbetur të vuajtjes së dënimit pranë familjarëve dhe të afërmve të tyre. Parashikohej që shpenzimet dhe kostot do të përballoheshin nga Britania për çdo ditë të qëndrimit dhe vuajtjes së dënimit në Shqipëri. Megjithatë, ‘Daily Mail’ zbulon se marrëveshja që i kushtoi 537 mijë paund taksapaguesve britanikë, ka rezultuar në riatdhesimin e vetëm tetë të dënuarve shqiptarë. BBC ka publikuar një çështje gjyqësore ku viktima e dhunës seksuale të një shqiptari në Britani ka kërkuar që ai të mos kthehet për të vijuar dënimin në vendin e tij. Shqiptari Miridon Bera u dënua në vitin 2023 me tetë vite e gjysëm burg për përdhunim. Viktimës së dhunës seksuale, Kate i mbërriti një email ku informohej për mundësinë e deportimit të Berës në Shqipëri. Kate kërkoi që ai të mos deportohet.