Spitali memorial i Fierit, i hapi dyert më 27 maj duke pritur pacientët e parë. Ndërsa të dielën, kreu ndërhyrjen e parë kirurgjikale me një staf mjekësh shqiptarë dhe turq. Këtë e ka konfirmuar vetë ministrja e shëndetësisë, ogerta manastirliu në një postim të saj në facebook. “Lajm i mirë, kryhet me sukses ndërhyrja e parë kirurgjikale në spitalin memorial të fierit nga ekipi i përbashkët shqiptaro-turk. S’ka kohë për pushim”, shkruan ajo. Ministrja nënvizon po ashtu se spitali i garanton qytetarëve shqiptarë një shërbim të standarjeve evropiane, duke filluar që nga urgjenca, kontrollet por edhe ndërhyrjet kirurgjikale. Spitali rajonal memorial, me një financim prej 70 milionë eurosh, u inaugurua më 21 prill, pak ditë para zgjedhjeve në vend, me mbështetjen e shtetit turk. Punimet morën një kohë rekord, prej vetëm tre muajsh. Ai do të mbulojë nevojat e banorëve të qarqeve Fier, Vlorë dhe Gjirokastër, duke qenë për ta një mundësi shërbimi pranë vendbanimit të tyre, pa qenë nevoja të drejtohen për në Tiranë. Spitali i Fierit është pjesë e rrjetit të spitaleve publike, por ndryshe nga ta, për herë të parë do të pilotohet autonomia spitalore, për t’u shtrirë më pas në të gjitha spitalet e Shqipërisë.