Kryenegociatorët e Kosovës dhe të Serbisë, Besnik Bislimi dhe Petar Petkoviç, ndodhen në Bruksel për raundin e ri të bisedimeve në dialogun e ndërmjetësuar nga Bashkimi Evropian për normalizimin e marrëdhënieve mes dy shteteve fqinje. Siç ka ndodhur edhe në të kaluarën, pritet që raundi i ri të fillojë me takime dypalëshe të delegacioneve me të dërguarin e posaçëm të BE-së për dialogun, Mirosllav Lajçak, e pastaj, nëse do të ketë vullnet nga palët, mund të zhvillohet edhe takimi i përbashkët trepalësh. Edhe zëdhënësi i BE-së, Peter Stano, duke folur një ditë para takimeve në kuadër të dialogut, tha se “koreografia do të jetë e zakonshme, BE-ja gjithmonë synon të ketë takime trepalëshe, por kjo do të varet nga vullneti i palëve”. Në takimin e fundit të zhvilluar në shtator, Lajçak nuk arriti të bindë Bislimin dhe Petkoviç të mbajnë një takim trepalësh, pasi ata kishin mospajtime për temat që do të donin t'i shtjellonin. Në lidhje me temat që pritet të shtjellohen në takimet në Bruksel, Stano tha se ato kanë të bëjnë me nevojën për zbatimin e detyrimeve nga dialogu i deritashëm, përfshirë edhe Marrëveshjen për rrugën drejt normalizimit të marrëdhënieve, për të cilën Kosova dhe Serbia ranë dakord në fillim të vitit 2023. Ditët e fundit, Lajçak ka zhvilluar konsultime me palët. Por, përvec pohimeve se po shqyrtohet rruga përpara në dialog, nuk janë dhënë hollësi se me cilat tema do të angazhohen palët në takimet e radhës.