Kryenegociatorët e Kosovës dhe Serbisë, Besnik Bislimi dhe Petar Petkoviç - nën ndërmjetësim të të dërguarit të Bashkimit Evropian për dialogun, Mirosllav Lajçak, takohen të mërkurën në Bruksel për të diskutuar zgjidhjen për çështjen e targave ilegale serbe. Sipas burimeve nga BE, palët kanë konfirmuar pjesëmarrjen në këtë takim, që është konsideruar urgjent. Nevoja për përpjekje maksimale për arritjen e një marrëveshjeje për targat është theksuar edhe në një takim të zhvilluar të martën mes Kurtit dhe ambasadorëve të Francës dhe Gjermanisë në Kosovë, Olivier Guerot dhe Jorn Rohde, ka thënë Qeveria e Kosovës përmes një komunikate.