Një punonjës i hekurudhave ka humbur jetën dhe dy të tjerë u lënduan në një aksident të ndodhur orët e para të mëngjesit të së martës në Greqi. Mediat lokale shkruajnë se tre punonjës të mirëmbajtjes në një tren elektrik në athinë u lënduan dhe njëri prej tyre humbi më pas jetën në spital. Të tre ata, u lënduan në një aksident pasi frenat e një vagoni në të cilin ata po punonin nuk funksionuan. Vagoni vazhdoi të lëvizte me shpejtësi drejt Pireut deri sa u përplas me një tren të zbrazët që u vendos në stacionin Agios Nikolaos, qëllimisht, për ta ndaluar atë. Duke folur për Skai TV, shefi i operatorit të trenave elektrikë, STASY, Nikolaos Hairetas, konfirmoi se kishte një viktimë. Bëhet fjalë për një punonjës 41 vjecar. Ndërkohë, stacioni është mbyllur dhe trenat po vazhdojnë të ecin vetëm mes Omonias dhe Pireut dhe mes Ano Pitissias dhe Kifissias. Operatori i trenave elektrikë njoftoi se do të risjellë gradualisht normalitetin në linjë, ndërsa në zonë ndodhen ekipet teknike për pastrimin e zonës.