Komisioni Evropian ka miratuar agjendat e reformave për Kosovën, Shqipërinë, Maqedoninë e Veriut, Malin e Zi dhe Serbinë, duke bërë të mundur hapin kyç për të mundësuar pagesat e para për vendet e Ballkanit Perëndimor nga Plani i Rritjes dhe reformave. Komisioni Evropian ka bërë me dije se vendimi u mor pasi shtetet anëtare të Bashkimit Evropian kanë dhënë pëlqimin e tyre për këto agjenda. Sipas REL, Bosnje-Hercegovina ka mbetur i vetmi vend për të cilin agjenda e reformave nuk është miratuar ende, pasi nuk dorëzoi me kohë agjendën e reformave. “Në planet e tyre ambicioze të reformave, pesë qeveritë e vendeve të Ballkanit Perëndimor shprehin përkushtimin për reformat fondamentale dhe socio-ekonomike të cilat do t’i ndërmarrin për të siguruar rritje dhe konvergjencë me BE-në në kuadër të Planit të Rritjes, gjatë periudhës prej vitit 2024 deri më 2027”, thuhet në njoftimin e BE.