Të gjithë prisnin që t’i ngjante një ndeshjeje të arteve të përzjera marciale, megjithatë debate televiziv mes 6 partive kryesore greke, rezultoi të ishte një dështim i vërtetë. Të shumtë ishin ata që jo pa ironi, thanë se një debat i tillë mund të përshkruhej fare mirë nga mjekët, në vend të ilaçeve kundër pagjumësisë. Të tjerë shkuan edhe më tej, teksa thanë se studiojae debatit të madh 10 ditë para zgjedhjeve, i cili u transmetua në mediat kryesore të vendit, ngjante me një ambient ku kafshët e egra kishin vendosur të hyjnë në grevë urie. Që në fillim të debatit, u vendosën rregulla mbytëse, të cilat përjashtonin çdo mundësi të një shkëmbimi të drejtpërdrejtë pikëpamjesh mes katër kandidatëve për kryeministra të vendit. Analistët politikë në vend thanë se nëse ky do të ishte kulmi i betejës zgjedhore gjashtëpalëshe, atëherë Greqia mund të jetë e sigurt se, të paktën për sa i përket dekorit dhe qetësisë së liderëve të saj politikë, nuk është më pak se Grenlanda apo Alaska. Ndërkohë në rrjetet sociale kishte nga ata që kritikonin edhe pyetjet e organizatorit të debatit, gazetarit Antonis Kanakis. “Në pyetjet e tij nënkuptohej qartë fjalia: Hajde të flasim për asgjë interesante, sepse në ekranin tjetër ka një ndeshje të rëndësishme Championsi, që mund të argëtojë njerëzit”, shkruhej në një nga komentet.