Grup Exor që ka pronësinë si aksionere shumice e Juventusit refuzoi ofertën e kompanisë Tether për blerjen e klubit. Exor, kompani në pronësi të familjes Agnelli shqyrtoi të premten ofertën e Tether, në përfundim të së cilës, bordi njoftoi refuzimin e kësaj oferte. Në komunikatën zyrtare thuhet se Exor, e cila mban 65,4 për qind të aksioneve të Juventusit, nuk ka asnjë qëllim të shesë klubin dhe mbetet plotësisht e angazhuar në projektin sportiv dhe menaxherial të “Zonjës së Vjetër”. “Ne mbetemi plotësisht të përkushtuar ndaj klubit, duke mbështetur ekipin e ri drejtues në zbatimin e një strategjie të qartë për të arritur rezultate solide, si në fushë ashtu edhe jashtë saj”, thuhet në deklaratë. Kompania Tether, që aktualisht zotëron aksione në minorencë te Juventusi, kishte ofruar 1.1 miliardë euro për aksionet e Exor.