Kombëtarja mbylli përgatitjet për ndeshjen me San Marinon. Skuadra jonë përfaqësuese në drejtimin e Rolando Maran zhvilloi seancën e fundit stërvitore në ‘Air Albania Stadium’ Të gjithë futbollistët janë stërvitur rregullisht për rreth 60 minuta me skuadrën që u përqendrua më shumë te pjesa taktike. Ajo që ra në sy është se mbrojtësi Ardian Ismajli u stërvit veçmas skuadrës për shkak të ngarkesës fizike të akumuluar në ndeshjet e fundit, por stafi mjekësor konfirmoi se futbollisti do të jetë gati për ndeshjen me San Marinon pasi nuk ka asnjë dëmtim. Ndërkaq, ka një tjetër ndryshim në listën e Kombëtares. Federata Shqiptare e Futbollit konfirmoi se Alen Sherri pas kontrolleve mjekësore të kryera për një shqetësim muskulor të ndjerë në ndeshjen me Finlandën, rezultoi se nuk mund të jetë i pranishëm në sfidën e kësaj të marte pasi nuk është në gjendje optimale për të luajtur. Kështu në vend të tij, trajneri ka thirrur në skuadër portierin e Kombëtares U21, Alain Taho.