Dy persona të lindur në Jordani, por me banim në Tiranë u arrestuan nga agjentët e antikrimit ekonomik e financiar pas një operacioni policor të koduar skadenca. Ata u arrestuan për falsifikim të vulave dhe formularëve, të cilat i vendosnin në mallra të skaduara me qëllim hedhjen e tyre në treg. Shtetasit, për të cilët policia jep vetëm inicialet kishin një magazinë me qera, ku tregtonin në sasi të mëdha produkte që kishin kaluar afatin e skadencës. Duke përdorur lëndë kimike, produkteve u vendoseshin data të reja skadence, për të shtyrë afatin deri në dy vjet. Në cilësinë e provës material u sekuestrua një vulë që përdorej për falsifikimin e datave të skadencës, 3 shishe me lëndë kimike të cilat përdoreshin për fshirjen e datave të skadencës dhe produkte të ndryshme të skaduara me datë prodhimi të falsifikuar. Operacioni u zhvillua nga seksioni i Krimit Ekonomik dhe Financiar, në bashkëpunim me Sektorin e Monitorimit dhe Hetimit të Drejtorisë së Përgjithshme të Agjencisë Kombëtare të Ushqimit, nën drejtimin e Prokurorisë së Rrethit Gjygjësor Tiranë. Mbi të arrestuarit qëndron akuza e Vepra penale Mashtrim me produktet ushqimore kryer në bashkëpunim dhe “ Falsifikim I vulvae, stampave dhe formularëve.