Për shtatë muaj me radhë, Tirana dhe shumë qytete të tjera të Shqipërisë u gjallëruan nga qindra aktivitete kulturore, organizuar në kuadër të Javëve Kulturore Ndërkombëtare, program i Ministrisë së Ekonomisë, Kulturës dhe Inovacionit. Këtë edicion të tretë e përmbyll më së miri dhe me shumë krenari Java kombëtare Kosovë-Shqipëri. Në kuadër të kësaj javë kulturore, më 25 nëntor në orën 18:00, në ArTurbina në kryeqytet do të mbahet koncerti koral “Jehonë Shqiptare” që do të ngjisë në skenë artistë profesioniste që kanë bërë historinë e artit shqiptar por edhe më gjerë, si nga Shqipëria dhe nga Kosova. Kjo mbrëmje i dedikohet artit dhe kulturës kombëtare, si jehonë për trashëgiminë tonë të pasur muzikore. Artistët nga Shqipëria dhe Kosova do të performojnë këngë nga të gjitha trevat shqiptare, në kuadër edhe të festave kuqezi të nëntorit, për të sjellë një mbrëmje e cila premton shumë emocione.