Ish kryeministri bullgar, Bojko Borisov, 62 vjec, u arrestua pasditen e të enjtes bashkë me anëtarë të tjerë të partisë së tij, në një hetim evropian të lidhur me keqpërdorimin e fondeve të ndihmave të BE-së. “Një operacion i madh ka nisur në lidhje me 120 raste në zyrën e prokurorit publik evropian në Bullgari. Bojko Borisov është arrestuar”, tha ministria e brendshme në një deklaratë për shtyp. Bashkë me tre herë kryeministrin konservator të bullgarisë, autoritetet arrestuan dhe ish ministrin e tij të financave, Vladislav Goranov, ish presidenten e komisionit parlamentar të buxhetit, menda stojanova dhe ish shefen e shërbimit të shtypit, Sevdalina Arnaudova ndërkohë që vazhdojnë kërkimet dhe konfiskimet në shumë adresa në vend. Shumë detaje nuk janë bërë të ditura por televizioni publik BNT tha se rastet kanë të bëjnë me keqpërdorimin e ndihmave të BE-së. “Askush nuk qëndron mbi ligjin”, shkroi ndërkohë në facebook kryeministri i ri bullgar, Kiril Petkov. Operacioni erdhi pas një vizite në Sofje të kryeprokurorës evropiane Laura Kovesi. Ajo përgëzoi kryeministrin aktual për vendosmërinë dhe lidershipin si edhe për vizionin e tij në luftën kundër korrupsionit. Në fakt, ish kryeministri është goditur nga një seri akuzash për korrupsion në vite por ka mohuar të ketë keqvepruar. Shembulli më i sikletshëm ka qenë në 2020-ën kur u publikuan foto që e tregonin atë ndërsa flinte me armë ose me tufa kartmonedhash 500-euroshe apo shufra ari pranë.