Një analizë e re e bazuar në dokumentet e Bordit Kombëtar të Sigurisë së Transportit në SHBA, hedh dritë mbi avionin që u rrëzua në Kinë më 21 mars 2022. Boeingu 737 i Kinës Lindore, me 132 persona në bord, me sa duket u rrëzua pas fikjes së qëllimshme të të dy motorëve gjatë fluturimit. Kjo hipotezë, më shumë se katër vjet më vonë, po fiton mbështetje gjithnjë e më të madhe në procesin e zbardhjes së katastrofës ajrore. Sipas raportit, Regjistruesi i të Dhënave të Fluturimit përshkruan një sekuencë dramatike: në afërsisht 8,800 metra, motorët u çaktivizuan dhe avioni u konfigurua për një zbritje të shpejtë, në një pjerrtësi ekstreme. Nuk pati përpjekje për rikuperim: presioni mbi levën e kontrollit ishte vazhdimisht "përpara", një shenjë kjo që tregon një dëshirë të qëllimshme për të përshpejtuar zbritjen. Brenda pak minutash, avioni arriti shpejtësi mbresëlënëse, duke tejkaluar 1,100 km/orë, shumë përtej kufijve të tij strukturorë. Shpejtësia e fundit e regjistruar ishte mbi 1,000 km/orë në një lartësi prej afërsisht 3,300 metrash. Në orën 14:23 sipas orës lokale, avioni u rrëzua në një kodër pranë Ëuzhou-t, duke mos lënë asnjë të shpëtuar. Pyetja që mbetet pa përgjigje është: kush e kreu aktin? Kapiteni, oficeri i parë apo oficeri i dytë? Autoritetet kineze nuk kanë dhënë përgjigje përfundimtare. Megjithatë, ekspertët përjashtojnë mundësinë e dështimeve teknike. Në atë lartësi, pohojnë ata, do të kishte qenë e mundur të rifitohej kontrolli i avionit. Të gjitha provat tregojnë për një veprim të qëllimshëm. Autoritetet kineze nuk publikuan asnjëherë një raport të plotë mbi aksidentin. Në vitin 2025, heshtja e tyre u justifikua me arsye të sigurisë kombëtare dhe stabilitetit shoqëror. Por, pavarësisht zbulimeve të reja, pamja mbetet e pjesshme sepse regjistruesi i zërit në kabinën e pilotit, të dhënat e të cilit mund të sqarojnë se çfarë ndodhi vërtet në bord në momentet e fundit, ende mungon.