Ka përfunduar takimi ndërmjet kryeministrit të Kosovës, Avdullah Hoti dhe presidentit të Francës, Emmanuel Macron. Lajmin e konfirmuan për mediat në Kosovë burime pranë kreut të ekzekutivit, të cilat thanë se detajet e asaj cfarë u diskutua mes dy liderëve, do të dalin më vonë. Pritja zyrtare e Hotit u bë në Pallatin Elize. Ajo paraprin samitin virtual të 10 korrikut në Paris mes Prishtinës e Beogradit, dhe atë të 12 korrikut që zhvillohet në Bruksel mes Hotit dhe Aleksandar Vucic. BE-ja u vu fort në lëvizje për dialogun pasi I dërguari I posacëm I presidentit amerikan Donald trump për të, Richard Grenell organizoi një takim mes palëve në Washington. Kjo përballje duhet të kishte ndodhur në 27 qershor, por nisma e Grenellit u shemb prej aktpadisë së ngritur papritmas nga Zyra e Prokurorit Special me seli në Hagë kundër presidentit të Kosovës Hashim Thaci për krime lufte dhe krime kundër njerëzimit. Vetëm disa ditë pas publikimit të aktpadisë, u bë njoftimi për rifillimin e bisedimeve të ndërmjetësuara nga Bashkimi Europian. Grenell megjithatë e ka paralajmëruar sërish një takim të ngjashëm së shpejti në Shtëpinë e Bardhë, por data ende nuk është caktuar.